കോഴിക്കോട്: തൊട്ടിൽപ്പാലത്ത് സ്കൂൾ അധ്യാപികയെ കാണാതായിട്ട് പത്തുദിവസം പിന്നിട്ടിട്ടും പൊലീസിന്റെ ഭാഗത്തുനിന്ന് കാര്യമായ അന്വേഷണ പുരോഗതിയില്ലാ എന്ന് കുടുംബത്തിന്റെ പരാതി. ഈ മാസം അഞ്ചിനാണ് മൊയിലോത്തറ സർക്കാർ എൽ.പി. സ്കൂളിലെ അധ്യാപികയായ അനുമോളെ കാണാതാകുന്നത്. ജോലിക്കായി രാവിലെ വീട്ടിൽനിന്ന് സ്കൂളിലേക്ക് പുറപ്പെട്ടതിന് പിന്നാലെയായിരുന്നു തിരോധാനം.അനുമോളെ കാണാതാകുന്നതിന് തൊട്ടുമുമ്പുള്ള ദിവസങ്ങളിൽ വടകര സ്വദേശിയായ ഒരാൾക്കൊപ്പം ഇവരെ കണ്ടിരുന്നതായി കുടുംബവും സഹപ്രവർത്തകരും പൊലീസിന് മൊഴി
നൽകിയിട്ടുണ്ട്. ഈ സാഹചര്യത്തിൽ ഒപ്പമുണ്ടായിരുന്ന വടകര സ്വദേശിക്കായി പൊലീസ് അന്വേഷണം വ്യാപിപ്പിച്ചിട്ടുണ്ട്. എന്നാൽ, അന്വേഷണത്തിൽ കാര്യമായ പുരോഗതി ഉണ്ടാകാത്തതിനെ തുടർന്ന് മകളെ എത്രയും പെട്ടെന്ന് കണ്ടെത്തണമെന്നാവശ്യപ്പെട്ട് കുടുംബം ഇപ്പോൾ കേരള ഹൈക്കോടതിയിൽ ഹേബിയസ് കോർപ്പസ് ഹർജി സമർപ്പിച്ചിരിക്കുകയാണ്.
കഴിഞ്ഞ അഞ്ചിന് പതിവുപോലെ സ്കൂളിലേക്ക് പോയ അനുമോൾ വൈകിട്ട് ക്ലാസ് കഴിഞ്ഞിട്ടും വീട്ടിൽ തിരിച്ചെത്താതിരുന്നതിനെ തുടർന്ന് കുടുംബം അന്ന് തന്നെ തൊട്ടിൽപ്പാലം പൊലീസിൽ പരാതി നൽകുകയായിരുന്നു. ഗുരുതരമായ കരൾ രോഗബാധയെ തുടർന്ന് ഭർത്താവ് സുഭാഷ് തന്റെ കരളിൽ ഒരു ഭാഗം ദാനം ചെയ്യുകയും, ആ ജീവന്റെ മാറ്റത്തിലൂടെ അനുമോൾ ജീവിതത്തിലേക്ക് തിരികെ എഴുന്നേൽക്കുകയും ചെയ്തത് ഏറെ ശ്രദ്ധിക്കപ്പെട്ടിരുന്നു. അധ്യാപികയെ കണ്ടെത്താൻ സമഗ്രമായ അന്വേഷണം വേണമെന്നാണ് നാട്ടുകാരുടെയും കുടുംബത്തിന്റെയും ആവശ്യം.
