വാഹനം പരിശോധിയ്ക്കാനൊരുങ്ങിയ പൊലീസ് ഉദ്യോഗസ്ഥരെ അനസ് അശ്ലീല ഭാഷയിൽ അസഭ്യം പറയുകയും യൂണിഫോമിൽ പിടിച്ചുവലിച്ചുകൊണ്ട് ആക്രമിക്കുകയായിരുന്നു. ബലപ്രയോഗത്തിലൂടെയാണ് പൊലീസുകാർ അനസിനെ കസ്റ്റഡിയിലെടുത്തത്.
കോഴിക്കോട്: സംശയാസ്പദമായ സാഹചര്യത്തിൽ കണ്ട സ്കൂട്ടർ പരിശോധിക്കാൻ ഒരുങ്ങിയ പന്തീരാങ്കാവ് സ്റ്റേഷനിലെ എസ്.ഐയെ അസഭ്യം പറഞ്ഞ് കൈയ്യേറ്റം ചെയ്ത സംഭവത്തിൽ യുവാവിനെ അറസ്റ്റ് ചെയ്തു. ഫറൂഖ് കോളേജിന് സമീപം പള്ളിമീത്തൽ സ്വദേശി അന്താൻതോട്ടത്തിൽ വീട്ടിൽ മുഹമ്മദ് അനസി(24) നെയാണ് പന്തീരാങ്കാവ് പൊലീസ് കസ്റ്റഡിയിലെടുത്തത്. ഇന്നലെയാണ് കേസിനാസ്പദമായ സംഭവം നടന്നത്. പന്തീരാങ്കാവ് കിങ് ബാറിന് സമീപം വെച്ച് ഡ്യൂട്ടിയിലായിരുന്ന പന്തീരാങ്കാവ് പൊലീസ് സ്റ്റേഷൻ സബ്ബ് ഇൻസ്‌പെക്ടർ വിനോദിന് നേരെയാണ് കൈയ്യേറ്റമുണ്ടായത്.
തൂഫാൻ ഡ്രൈവിന്റെ ഭാഗമായി എസ്.ഐയും സംഘവും പന്തീരാങ്കാവ് കിങ് ബാറിന് സമീപം എത്തിയപ്പോൾ നമ്പർ പ്ലേറ്റില്ലാത്ത സ്‌കൂട്ടറിന് മുകളിൽ ഇരിക്കുകയായിരുന്നു അനസ്. തുടർന്ന് യുവാവിനോട് വാഹനത്തിന്റെ രേഖകൾ ആവശ്യപ്പെട്ടപ്പോൾ ”എന്റെ കൂട്ടുകാരന്റെ വണ്ടിയാണ്. വേണമെങ്കിൽ അവനോട് ചോദിച്ചോ” എന്ന് മറുപടി പറഞ്ഞു. തുടർന്ന് വാഹനം പരിശോധിയ്ക്കാനൊരുങ്ങിയ പൊലീസ് ഉദ്യോഗസ്ഥരെ അനസ് അശ്ലീല ഭാഷയിൽ അസഭ്യം പറയുകയും യൂണിഫോമിൽ പിടിച്ചുവലിച്ചുകൊണ്ട് ആക്രമിക്കുകയായിരുന്നു. ബലപ്രയോഗത്തിലൂടെയാണ് പൊലീസുകാർ അനസിനെ കസ്റ്റഡിയിലെടുത്തത്. തുടർന്ന് കോടതിയിൽ ഹാജരാക്കി റിമാന്റ് ചെയ്തു.
