യുവതിയെ കബളിപ്പിച്ച് 28 ലക്ഷത്തോളം രൂപ വിലമതിക്കുന്ന സ്വർണാഭരണങ്ങളും, 4,000 രൂപയും തട്ടിയെടുത്ത കേസിൽ പ്രതി മാള പോലീസിൻറെ പിടിയിലായി
തൃശൂർ: യുവതിയെ കബളിപ്പിച്ച് 28 ലക്ഷത്തോളം രൂപ വിലമതിക്കുന്ന സ്വർണാഭരണങ്ങളും, 4,000 രൂപയും തട്ടിയെടുത്ത കേസിൽ പ്രതി മാള പോലീസിൻറെ പിടിയിലായി. പള്ളുരുത്തി സ്വദേശിയായ സൽമാനുൽ ഫാരിസാണ് (27) അറസ്റ്റിലായത്. പള്ളുരുത്തിയിൽനിന്നുമാണ് ഇയാളെ പോലീസ് സംഘം പിടികൂടിയത്. സ്വർണം തിരികെ നൽകാമെന്ന് പറഞ്ഞു വിശ്വസിപ്പിച്ച് 2024 ജൂൺ മുതൽ 2025 ഒക്‌ടോബർ 30 വരെയുള്ള കാലയളവിൽ പ്രതി പരാതിക്കാരിയിൽ നിന്ന് പലതവണകളായി 29.50 പവൻ സ്വർണാഭരണങ്ങളും 4,000 രൂപയും കൈക്കലാക്കുകയായിരുന്നു.
പറഞ്ഞ കാലാവധി കഴിഞ്ഞിട്ടും സ്വർണവും പണവും തിരികെ നൽകാതെ വഞ്ചിച്ചതിനെ തുടർന്നാണ് യുവതി കഴിഞ്ഞ വർഷം പോലീസിൽ പരാതി നൽകിയത്. സർക്കിൾ ഇൻസ്‌പെക്ടർ എ എൻ ഷാജുവിൻറെ നിർദേശപ്രകാരം മാള എസ്എച്ച്ഒ വിശാഖ് കെ വിശ്വൻ, എസ്ഐ കെആർ സുധാകരൻ, സിപിഒ ഹരികൃഷ്ണ ഐയു, ഹോം ഗാർഡ് വിനോദ് പിടി എന്നിവരടങ്ങിയ പ്രത്യേക അന്വേഷണ സംഘമാണ് അതിവിദഗ്ദ്ധമായി പ്രതിയെ വലയിലാക്കിയത്.
