കൊല്ലം: സ്വത്തുതർക്കത്തെ തുടർന്ന് സ്വന്തം അമ്മയുടെ ദേഹത്ത് തിളച്ചവെള്ളമൊഴിച്ച് പൊള്ളിച്ച ശൂരനാട് സ്വദേശി അശ്വതി (അശ്വതി അച്ചു) നിരവധി സാമ്പത്തിക തട്ടിപ്പുകളിലും ഹണിട്രാപ്പ് കേസുകളിലും പ്രതിയായ സ്ഥിരം കുറ്റവാളിയെന്ന് പോലീസ്. വ്യാജ സോഷ്യൽ മീഡിയ പ്രൊഫൈലുകൾ നിർമ്മിച്ച് ഇവർ നടത്തിയ തട്ടിപ്പുകളിൽ ഉന്നത പോലീസ് ഉദ്യോഗസ്ഥരും രാഷ്ട്രീയ പ്രമുഖരും ഉൾപ്പെടെ നിരവധി പേർ ഇരയായിട്ടുണ്ട്. സംഭവത്തിന് പിന്നാലെ ഒളിവിൽ പോയ അശ്വതിക്കും മകൾ അമൃതയ്ക്കുമെതിരെ ചടയമംഗലം പോലീസ് ജാമ്യമില്ലാ വകുപ്പുകൾ പ്രകാരം കേസെടുത്ത് അന്വേഷണം ഊർജ്ജിതമാക്കി.
മറ്റു പെൺകുട്ടികളുടെ ചിത്രങ്ങൾ ഉപയോഗിച്ച് വ്യാജ അക്കൗണ്ടുകൾ ഉണ്ടാക്കിയാണ് അശ്വതി തട്ടിപ്പ് നടത്തിയിരുന്നത്. പോലീസുകാരെ കേന്ദ്രീകരിച്ച് സൗഹൃദം സ്ഥാപിക്കുകയും, തുടർന്ന് അശ്ലീല ചാറ്റുകളിൽ ഏർപ്പെട്ട് ഭീഷണിപ്പെടുത്തി പണം തട്ടിയെടുക്കുകയുമായിരുന്നു രീതി. 2022-ൽ കൊല്ലം റൂറൽ പോലീസിലെ ഉദ്യോഗസ്ഥന്റെ പരാതിയിൽ ഇവർക്കെതിരെ കേസ് എടുത്തിരുന്നു. ഭീഷണിപ്പെടുത്തി ഒരു ലക്ഷത്തോളം രൂപ തട്ടിയെടുത്തെന്നായിരുന്നു പരാതി. 2023-ൽ ഭിന്നശേഷിക്കാരിയായ മകളെ സംരക്ഷിക്കാമെന്നും രണ്ടാം വിവാഹം കഴിക്കാമെന്നും വാഗ്ദാനം ചെയ്ത് പൂവാർ സ്വദേശിയായ 68-കാരനിൽ നിന്ന് പണം തട്ടിയ കേസിലും ഇവർ അറസ്റ്റിലായിരുന്നു.
വീടും സ്ഥലവും എഴുതി നൽകണമെന്ന് ആവശ്യപ്പെട്ടാണ് അമ്മ രാധാമണിയുടെ ദേഹത്ത് ഇവർ തിളച്ചവെള്ളമൊഴിച്ചത്. എട്ട് മാസം മുൻപ് സ്വന്തം പിതാവിന്റെ മുഖത്തും ഇവർ തിളച്ചവെള്ളമൊഴിച്ച് പൊള്ളിച്ചിരുന്നതായി ആരോപണമുണ്ട്. അമ്മയെ ആക്രമിച്ച കേസിൽ അശ്വതിയെയും മകളെയും ഉടൻ പിടികൂടുമെന്ന് പോലീസ് അറിയിച്ചു.
