ചോദ്യപേപ്പർ ചോർച്ചയുമായി ബന്ധപ്പെട്ട് ജന്തർമന്തറിൽ വിദ്യാർഥി പ്രക്ഷോഭം തുടരുന്നതിനിടെ വിദ്യാർഥികളെ അഭിസംബോധന ചെയ്ത് അർധരാത്രിയിൽ വിഡിയോ സന്ദേശവുമായി പ്രധാനമന്ത്രി നരേന്ദ്രമോദി. ചോദ്യപേപ്പർ ചോർച്ചയിൽ സർക്കാർ കർശന നടപടികൾ സ്വീകരിക്കുമെന്നാണ് മോദി വിഡിയോയിലൂടെ ഉറപ്പുനൽകിയിരിക്കുന്നത്. പിന്നാലെ മോദിയുടെ വിഡിയോയെ വിമർശിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി രംഗത്തെത്തി. വിദ്യാർഥികളുടെ ബുദ്ധിയെ അപമാനിക്കരുതെന്നാണ് രാഹുലിന്റെ വിമർശനം.
22 ലക്ഷം വിദ്യാർഥികൾക്കായി ഏറ്റവും വേഗത്തിൽ പരീക്ഷകൾ സംഘടിപ്പിക്കാൻ സർക്കാരിന്റെ മുഴുവൻ സംവിധാനവും ഉപയോഗിക്കുമെന്നാണ് മോദി വിഡിയോയിലൂടെ പറയുന്നത്. പരീക്ഷാ ചോദ്യപേപ്പർ ചോർച്ച കേസുകളിൽ ഫാസ്റ്റ് ട്രാക്ക് കോടതികൾ രൂപീകരിച്ച് കർശന ശിക്ഷ ഉറപ്പാക്കുമെന്നും അദ്ദേഹം പറഞ്ഞു.
അർധരാത്രി മോദി പുറത്തുവിട്ട വിഡിയോ പ്രഹസനമാണെന്ന് രാഹുൽ ഗാന്ധി കുറ്റപ്പെടുത്തി. പരിതാപകരമായ അർധരാത്രി വിഡിയോയാണ് പ്രധാനമന്ത്രി പങ്കുവച്ചിരക്കുന്നത്. ധർമ്മേന്ദ്ര പ്രധാൻ രാജിവയ്ക്കുക, വിദ്യാർഥികളെ മർദിച്ചവർക്കെതിരെ നടപടിയെടുക്കുക, മാപ്പ് പറയുക തുടങ്ങി മൂന്ന് ആവശ്യങ്ങളാണ് രാഹുൽ ഗാന്ധി മുന്നോട്ട് വച്ചിരിക്കുന്നത്.
അതേസമയം നീറ്റ് പരീക്ഷാ ക്രമക്കേടിൽ കേന്ദ്രത്തിന് എതിരെ 26 ദിവസമായി തുടരുന്ന നിരാഹാര സമരം സോനം വാങ്ചുക് അവസാനിപ്പിച്ചു. സിജെപി സമരം പടർന്നുപിടിച്ചതോടെ പ്രതിഷേധം ശമിപ്പിക്കാൻ തിരക്കിട്ട നീക്കങ്ങൾ നടത്തുകയാണ് കേന്ദ്രസർക്കാർ. നിഷ്പക്ഷ വേദിയിൽ ചർച്ചയാകാമെന്ന സമരക്കാരുടെ നിർദേശം കേന്ദ്രം അംഗീകരിച്ചു. നിർണായക കൂടിക്കാഴ്ച ഇന്ന് ഉച്ചയ്ക്ക് 12.30ന് ഡൽഹി കൺസ്റ്റിറ്റിയൂഷൻ ക്ലബ്ബിൽ നടക്കും.
